A Comunidade Mercedaria e a Confraría da Mercé anuncian o programa do triduo na honra da nosa Nai da Mercé, que como é tradicional cada mes de setembro se celebrará con motivo da festividade. Nesta ocasión será do 22 ao 24, de domingo a martes, celebrándose a procesión ao terminar o primeiro oficio.
Así, o domingo 22 de setembro celebrarase a Eucaristía na capela mercedaria ás 11.00 horas e ao terminar comezará o desfile coa imaxe da nosa Señora da Mercé polas rúas contiguas. É tradición que o Coro Toxos e Froles lle adique a canción “María da Mercé”.
A procesión seguirá o percorrido que antiguamente facía a Virxe Branca. Como o pasado ano, irá pola rúa María ata o parque municipal Raíña Sofía e descenderá por Imeldo Corral ata a avenida Emilio Antón, continuando por Real e regresando á capela da Mercé pola rúa Arce.
Os dous días seguintes, luns e martes 23 e 24 de setembro, celebraranse as eucaristías ás 19.00 horas. Todos os días predicará o arcipreste de Ferrol, Cándido Jesús Otero López.
