A Xunta de Confrarías e Irmandades da Semana Santa Ferrolá xa está inmersa, hai tempo, na organización dos actos de 2027. No ano próximo o Domingo de Ramos será o 21 de marzo e o de Resurrección, o 28, de maneira que “cae” moi pronto, só un día por detrás daquela de 2016, a máis temperá que recordamos, que se celebrou do 20 ao 27 de marzo.
Están xa marcadas no calendario as datas dos actos que invariablemente forman parte do preámbulo de cada Semana Santa en Ferrol. O 15 de xaneiro será a presentación do cartel, que na vindeira edición protagonizará a Confraría da Soidade coincidindo co 70 aniversario desde que se constituiu a irmandade. O acto terá lugar de novo, como pasou por primeira vez en 2026, no salón de recepcións do Concello de Ferrol.
O Vía Crucis organizado pola Xunta Xeral de Confrarías celebrarase o venres 19 de febreiro, ás 20.00h, saíndo da igresa de Dolores.
Para o día 5 de marzo, venres, programouse a presentación da nova edición da revista Ecce Homo e do procesionario. O acto terá lugar na capela do Centro Torrente Ballester, ás 18.00h. E por último, o teatro Jofre acollerá a lectura do pregón o día 13 de marzo, sábado, tamén ás 19.00h.
